اذا مريت صدفة ع ها الطريق
ولمحت ع كتف التل مارد سهران
عالداير غار حَور توت وسنديان
وريحة حبق منتور فل وبيلسان
هونيك وبأعلى التل بيتنا العتيق
ميّل عالمصطبة وخود نفس عميق
غنّج الحبق وارتاح شوي عالديوان
وهونيك ع رديف الشباك النعسان
دويك ع زندو غافي ب المي مليان
بَلبِل ريقك بدمعة منو على الريق
هالبيت الضيّق بيساع الف صديق
صدرو محبة وبالكَرَم كفّو عمران
بابو للزوار تاج العز وعنوان
الخبز والملح زاد للضيف السهران
هيدا البيت حضنو دافي وقت الضيق
