جدي/ بقلم الكاتبة والشاعرة احسان صياح عيد

ماشي بالضيعة مغندر
ع شفافو شوارب عنتر
بيتأبا متل الغزال
ناسي حالو هالاسمر

شوارب جدي ملفى النسر
بالشيبة عنوان النصر
شروالو مقصب يا عين
وعصاتو حصانو الابهر

راسو مرفوع يحيي
كل مين يرمي التحية
بيرفع ايدو بالعالي
حامل طربوشو الأحمر

شايف حالو بعدو شب
وبعيون الحلوة بينحب
بعدو عايش شبابو
وبجمالو عم ينغر

لما قبالو حلوة تطل
طرف صابيعو بيبل
بيفتل شارب مع بسمة
ويغمزها حتى تحمّر

وبأيام الشتوية
بيتحسّر ع الصبية
يحلم يغمرها ويشد
وع الفكرة راسو بينحر
٥- ٩- ٢٠٢٢ بقلمي✍ إحسان صياح عيد