ضيعة النور
فحت ريحة البخور
منك يا أرض الخيرات
ورقصت شلوح الزيتون
ع صدى لحن النغمات
ع تلالك يا ضيعتنا
منسكر من صدى الهيصات
وحجال تربى مخباية
تكرج وتملّي الخلات
واللوز يزهّر فرحان
رسم ع تمّو البسمات
وفاض المرج بالوانو
يسكر من غنج النسمات
حتى الليل مد جناحو
يرقص ع دفا الهمسات
بواب البيت تشرعت
وبالنور شعّت العتبات
سكرت مرجات حقولك
ومدّت بشلوحا الخيرات…
رجعوا تجمعوا الأحباب
بالساحة ملقى السهرات
و الدبكة تغمر ايدين
تعمّر احلام الساحات
والافراح تِغني القلوب
بالضحكة تمحي الدمعات
بيلبق لجبينك العز
والطلة تاج الغيمات
